Date:  20 September 2011

                      Xildhiban Publications Presents

Buugga
"Kobacii Islaamiyiinta Soomaaliya"
ee qoray C/shakuur Mire Aadan "Cobol"

London, 20 Septembar, 2011 Xildhibanpublications. Buuggan la magac baxay Kobaca islaamiyiinta Soomaaliya, waa buug soo bandhigaya qoraallo & xaqiiqooyin si tafaftiran u koobaya taariikhdii & halgankii dheeraa ee xoogag ka tirsan Soomaalidu u soo galeen sidii maamul Islaami ah looga hirgelin lahaa dhulka jamhuuriyadda Soomaaliya. Dhinaca kale waxaan ugu hambalyeynayaa dadaalka dheeriga ah ee uu sameeyay waqtigan adag qoraaga buuggan C/shakuur Mire Aaden, sidaas darteed waxaan ummadda Soomaaliyeed ku dhiirigelinayaa akhrintiisa maadaama uu buuggani xambaarsan yahay warbixinno, xogo sugan & macluumaadyo la ururiyay waqtigan adag ee ay ummadda Soomaalidu ku jirto.  

Waxaan marka hore mahad & ammaan ballaaran u celinayaa qoraaga buuggan la magac baxay Kobaca islaamiyiinta Soomaaliya MD. C/shakuur Mire Aaden in uu igu sharfo qoraalka hordhaca ah ee uu buuggani yeelanayo.

Dhinaca kale waxay dad badani aaminsan yihiin in kooxaha islaamiyiinta ee ka jira dalka Soomaaliya in ay dalka abuurmeen waxyar ka dib markii la riday xukuumaddii ugu waqtiga dheereyd ee soo marta dalka jamhuuriyadda Soomaaliya ee uu madaxda ka ahaa Allaha u naxariistee madaxweynihii hore ee dalka Soomaaliya S/Gaas Max’ed Siyaad Barre.

Haddaba sida buuggani qorayo bilowgii ama kobaca islaamiyiinta Soomaaliya & dagaalkii ay xukuumaddii dhexe ee Soomaaliya la gashay ka dib markii ay dowladdaasi ku dhawaaqday in ay qaadatay mabda’a “Hantiwadaagga Cilmiga ku dhisan” & barnaamijkii “Xeerka Qoyska” & dilkii la dilay culimo gaareysa 10, culimadan oo la sheego in ay qaarkood wax ku soo barteen dalalka Saudi Arabia, Egypt, Sudan & dalal kale oo ka tirsan khaliijka isla markaana ka horyimid xeerkaasi.

Buuggan wuxuu si xeeladeysan ama xarago leh u soo bandhigayaa halgankii dheeraa ee xoogagga islaamiyiinta Soomaaliya u soo galeen sidii ay dalka Soomaaliya uga abuuri lahaayeen ama uga dhalin lahaayeen dowlad Islaami ah oo dalka ku maamusha shareecada Islaamka.

Sidoo kale buuggani wuxuu soo bandhigayaa magacyadii hoggaamiyeyaashii ururradii magaca Islaamka sitay ee soo maray dalka Soomaaliya, dagaalladii ay galeen, goobihii ay dagaalladaasi ka dhaceen, guulihii & guuldarrooyinkii ay kala kulmeen, goobihii ay dagaalladu ku dhexmmareen iyaga & kooxihii ay dagaallada ay la galeenba.
Shaki kuma jiro in dadka Soomaaliyeed ay yihiin 100% muslimiin sunniyiin ah, wallow kooxaha Al-Shabaab & Xisbul Islaam ay ku doodayaan in Soomaalidu 5% ay yihiin muslimiin, haddana lama oga halka ay Soomaaliya kaga dhaqan yihiin ama kaga nool yihiin 95%ta Soomaalida gaalada ah.

Dowladda KMG ah ee hadda ka jirta dalka Soomaaliya caalamkuna aqoonsan yihiin ayaa ansixisay ku dhaqanka shareecada Islaamka waxyar ka dib markii ay la wareegeen talada dalka Soomaaliya, haddana kooxaha ka soo horjeeda dowladda KMG ah ee ku dooda ku dhaqanka shareecada Islaamka waxay dagaallo qaraar isla markaana ay dhiig badani ku daateen xilliga buuggani qormayo weli ku dhexmarayaan caasimadda dalka Soomaaliya ee magaalada Muqdisho, waxyar ka dib markii uu dalka dib ugu soo laabtay mid ka mid ah hoggaamiyeyaasha mayalka adage e dalka Soomaaliya Xassan Daahir Aweys.

Inta la xusuusan karo dagaalladii ugu qaraaraa waxay ka dhaceen magaalooyinka Araare halkaas oo ay isaga horyimaadeen kooxdii uu hoggaamin jiray General Max’ed Faarax Xassan “Caydiid”, sanadkii 1991dii, halka dagaalkii xigayna uu ka dhacay deegaannada Waqooyi Bari ee Soomaaliya “Puntland” halkaas oo ay isaga horyimaadeen Col. C/llaahi Yuusuf Axmed, sanadkii 1993dii lagagana adkaaday.

Dhinaca kalena waxay dagaallo ku dhexmareen deegaanno ka tirsan Koofur Galbeed ciidamadii ururkii SNF ee uu hoggaamin jiray General Cumar Xaaji Max’ed “Masalle” oo ay taageerayaan ciidamada dalka Ethiopia, dabayaaqadii sanadkii 1996dii waxyar ka dib geeridii General Caydiid.

Ugu dambeyntiina ay dagaallo ay kooxaha islaamiyiintu kaga adkaadeen hoggaamiyeyaashii kooxaha magaalada Muqdisho, taas oo u suurtagalisay in ay gacanta ku dhigaan inta badan gobollada koofureed ee jamhuuriyadda Soomaaliya, taas oo sababtay in ay dalka soo galaan dalka aan deriska nahay ee Ethiopia, dhinaca cirkana ay duqeymo xoog lihi kaga imanayay ciidamada dalka Mareykanka.

Goobihii ay weeraradaasina ka dhaceen waxaa ka mid ah;-
1. Gobolka Jubba Hoose
2. Gobolka Jubbada Dhexe
3. Magaalada Baargaal oo ka tirsan deegaannada hoos yimaada Puntland.
4. Magaalada Dhuusamareeb halkaas oo ay ku dileen hoggaamiyihii kooxda Al-Shabaab,

Max’ed Xaashi Ceyrow & xubno ka tirsan kooxdaasi taariikhdu markii ay aheyd 01/05/2008.
Dagaallo qaraar ka dib, ka bixitaankii ciidamada Ethiopia ee dalka Soomaaliya dabayaaqadii bishii December sanadkii 2008 ayay dib kooxaha islaamiyiinta ahi oo ay la socdaan xoogag ajnabi ah dib ugula wareegeen inta badan koofurta dalka Soomaaliya, iyadoo magaalada Baledweyne ee gobolka Hiiraan-na ku qaarajiyay weerar ismiidaamin ah wasiirkii ammaanka ee dowladda KMG ah ee Soomaaliya Col. Cumar Xaashi Aaden & danjirihii hore ee Soomaaliya u fadhin jiray dalka Ethiopia C/kariim Faarax Laqanyo, iyadoo ay jiraan in kooxdani lagu eedeynayo isla markaana ay dhinacooduna qirteen dilalka qorsheyn ee wixii ka dambeeyay sanadkii 2000 lagu qaarajiyay saraakiil, aqoonyahanno, dhaqaatiir, waxgarad & mas’uuliyiin kale oo isugu jirta qeybaha bulshada Soomaalida.

Haddaba waqtiga buuggani qormayo waxay weli dagaallo ka soconayaan ama ku dhexmarayaan magaalada Muqdisho ciidamada dowladda KMG ah & kooxaha uu mowqifkoodu fogaaday ee ka hanaqaaday dalka jamhuuriyadda Soomaaliya oo gacan ka helaya xubno ka mid ah kuwa loo doonayo dabka ka holcaya caalamka, wallow aan la heynin inta tiradoodu la’eg tahay.

Xubnahan oo la sheego in ay ka mid ahaayeen ururka “Al-Qeada” ee uu hoggaamiyo Usama bin Laden, kana yimid dalalka Pakistan & dalka ay weli dagaalladu ka soconayaan ee Afghanistan.

Ugu dambeyntii waxaa xusid mudan intii ay dagaalladu ka socdeen dalka Soomaaliya aan la arkin carruur ay da’doodu gaareyso 10-18 jir oo u dagaallamaya hoggaamiye kooxeedyadii laga itaal roonaaday ee Soomaaliya ayay dhinacyada kale ee kooxaha Al-Shabaab & Xisbul Islam adeegsanayaan carruur aan aqoon durugsan u laheyn diinta Islaamka & waxa ay u dagaallamayaan.













Qoraa sare
C/casiis Cali Ibrahim “Xildhiban”
London, United Kingdom

Xildhiban Publications, London

Waxay kuu dhigeen ma kugu dhaqeen

.

Taxanaha Taariikhda Soomaaliya

Maahmaahyo Murti
& Madadaallo

.

More Books ....